A cewar rahoton Ofishin Yada Labaran Hauza, sakon wanda aka karanta a ranar Alhamis, 1 ga watan Janairu, 2026, a dakin taro na Al-Farabi, yana kunshe da bayanai kamar haka:
Sakon Ayatullah Subhani
Da sunan Allah Mai Rahama Mai Jinkai
Malamai da masana wadanda su ne fitilun ilimi da al’adu, kamar masu rike da tocila ne da suke haskaka hanya ga masu neman bincike da sani, sannan al’umma tana amfana da tunaninsu da binciken da suke yi.
Saboda haka, karrama su wajibi ne na tarbiyya; kamar yadda girmama malami ga dukkan wadanda suka amfana da iliminsa yake zaman wajibi na lamiri.
A wata riwaya daga Imam Hassan al-Askari (AS), an ce lokacin da wani malami ya shiga majalisi, sai Imam ya fifita shi a kan dukkan danginsa, ya kuma zaunar da shi a saman majalisin. Sa’ilin da aka nuna rashin amincewa da wannan hali na sa, sai Imam ya amsa da cewa: "Shi (malamin) yana hukunta makiya ta hanyar hujjojin ilimi."
Babban masani, Hujjatul Islam wal Muslimin Mahdavi-Rad, yana daya daga cikin fitattun misalan wannan mizani. Tun daga lokacin kuruciyarsa har zuwa yanzu, ya ci gaba da gudanar da bincike masu kima a fannonin al’adun Musulunci daban-daban; musamman ayyukansa na Alkur’ani da na tarihi wadanda suke da matukar amfani da haskaka hanya.
Baya ga haka, yana da sabbin hanyoyi na bincike. Mujallar "Ayine-ye Pajhoohesh" (Madubin Bincike) tana daya daga cikin ayyukansa na basira, wacce cikin sa’a take ci gaba da fita har zuwa yau.
Ina mika gaisuwa da godiya ga dukkan masoyan da suka halarci taron karrama wannan jigo na ilimi a Hauza da Jami'a, sannan ina rokon Allah Madaukakin Sarki ya kara wa Malam Mahdavi-Rad nasarori a kullum. Ina fatan ya karbi wannan dan karamin yabo daga gare ni; domin kuwa matsayinsa na ilimi ya cancanci fiye da haka.
Ja'afar Subhani
Your Comment